«Алматылық жылу желілері» ЖШС мәліметінше, жылу энергиясы үшін төлем жасамаған тұтынушылардан миллиардтаған қарызды сот арқылы өндіріп алу шаралары жүргізілуде. Бұл шаралардың аясында мүлік пен банк шоттарына тыйым салынып, Қазақстан Республикасынан шығуға тыйым салу, сондай-ақ қарыз толық өтелгенге дейін ыстық судан ажырату шаралары қолданылады.
«Борышкерлерге бірнеше мәрте ескерту жасалғанына қарамастан, кейбір тұтынушылар коммуналдық қызмет көрсетушінің заңды талаптарын елемеуді жалғастыруда. Биылғы жылдың басынан бері 600-ден астам абоненттің ыстық суы өшірілді. Сонымен қатар, заңды тұлғаларға 3345 сотқа дейінгі талап хаты жолданды», – делінген жұма күні таратылған баспасөз хабарламасында.
Компанияның мәліметінше, жылу және ыстық су үшін қарызы бар 5184 борышкерге қатысты жұмыс жүргізілген, оның ішінде сотқа талап-арыздар мен нотариустарға атқарушылық жазбалар жасау туралы өтініштер жолданған.
«Қазіргі таңда сот орындаушылары борышкерлерден қарызды өндіріп алу шараларын жалғастыруда. 1 754 борышкерге қатысты шектеу шаралары қолданылған:
926 адамға (жылжымалы және жылжымайтын) мүлікке тыйым салынды;
822 банк шотына бұғат қойылды;
254 азаматқа елден шығуға тыйым салынды;
144 адамның жалақысы мен өзге де кірістерінен берешек ұсталынды», – деп нақтылады АлТС.
Қазіргі таңда Алматы тұтынушыларының жылу мен ыстық су үшін жинақталған жалпы қарызы шамамен Т2 млрд теңгені құрайды.
«Алматылық жылу желілері» ЖШС тұрғындарды жауапкершілік танытып, қарыз жинамай, жылу қызметтерін уақытылы төлеуге шақырады, – деп қосты компания өкілдері.
Фото көзі: Пресс--служба АлТС.